Gujarat Vs Chennai: ఓడి గుజరాత్ ఇంటికెళ్తుందా? గెలిచి చెన్నై ముందుకెళ్తుందా?

ఇంటర్నెట్ డెస్క్: పాయింట్ల పట్టికలో అట్టడుగున కొనసాగుతున్న గుజరాత్‌తో ప్లేఆఫ్స్ రేసులో ఉన్న చెన్నై తలపడేందుకు సిద్ధమైంది. అహ్మదాబాద్‌లోని నరేంద్ర మోదీ స్టేడియం వేదికగా మ్యాచ్‌ రాత్రి 7.30గంటలకు ప్రారంభం కానుంది. 

తేలికైన ప్రత్యర్థే కానీ.. 

• ప్రస్తుత సీజన్‌లో అన్ని జట్ల కంటే గుజరాత్ మాత్రమే చెన్నైకు తేలికైన ప్రత్యర్థి. ఆ జట్టు మిగతా మ్యాచుల్లో రాజస్థాన్‌, బెంగళూరుతో తలపడనుంది. బెంగళూరు వరుస విజయాలతో దూసుకుపోతుండగా.. రాజస్థాన్‌ పాయింట్ల పట్టికలో రెండో స్థానంలో ఉంది. 
• గుజరాత్‌పై చెన్నై విజయం సాధిస్తే ప్లేఆఫ్స్‌ రేసులో ముందుకు దూసుకొస్తుంది. పాయింట్ల పట్టికలోనూ మూడో స్థానానికి చేరుకుంటుంది. అప్పుడు సన్‌రైజర్స్ నాలుగో స్థానానికి పడిపోతుంది.
• ఈ మ్యాచ్‌లో గుజరాత్‌ గెలిచినా పెద్ద ఉపయోగం ఉండదు. కాకపోతే అధికారికంగా ఎలిమినేట్‌ కాకుండా ఉంటుంది. పాయింట్ల పట్టికలో ఎనిమిదో స్థానానికి చేరుకుంటుంది. వరల్డ్ కప్‌ ట్రావెల్‌ రిజర్వ్‌ కోసం ఎంపికైన కెప్టెన్‌ గిల్‌కు ఈ మ్యాచ్‌ కీలకం.
• చెన్నై బౌలింగ్‌ విభాగంలో కీలకంగా వ్యవహరించిన పతిరన, ముస్తాఫిజుర్ ఇప్పటికే ఆ జట్టు క్యాంప్‌ను వదిలి స్వదేశానికి చేరారు. దీంతో దేశవాళీ బౌలర్లు తుషార్ దేశ్‌పాండే, సిమర్‌జిత్, శార్దూల్, జడేజా కీలక పాత్ర పోషించాల్సిన అవసరం ఉంది. 
• చెన్నై బ్యాటింగ్‌ విభాగంలో అజింక్య రహానె కుదురుకోవాల్సిన అవసరం ఉంది. కెప్టెన్ రుతురాజ్‌ (541) ఆరెంజ్‌ క్యాప్‌ రేసులో ఉన్నప్పటికీ.. విరాట్ (634) కంటే 93 పరుగుల వెనుకబడి ఉన్నాడు. శివమ్‌ దూబె, ధోనీ నుంచి అభిమానులు కీలక ఇన్నింగ్స్‌ ఆశిస్తున్నారు.
• అహ్మదాబాద్‌ పిచ్‌ బ్యాటింగ్‌కు అనుకూలంగా ఉంటుందనేది క్రికెట్ విశ్లేషకుల అంచనా. టాస్‌ నెగ్గే జట్టు బౌలింగ్‌ ఎంచుకునే అవకాశాలు ఎక్కువ.
• ఇప్పటి వరకు చెన్నై, గుజరాత్ ఆరు మ్యాచుల్లో తలపడగా.. చెరి మూడు విజయాలు సాధించాయి. గతేడాది ఫైనల్‌లో జీటీపై చెన్నై చివరి బంతికి విజయం సాధించిన సంగతి తెలిసిందే.
• రుతురాజ్ గైక్వాడ్ ఇప్పటి వరకు 10 మ్యాచుల్లో టాస్‌ ఓడిపోయాడు. అందులో ఐదింట్లో గెలవడం విశేషం. ఈ సీజన్‌లో ఎక్కువ సార్లు టాస్‌ ఓడిన జట్టు కూడా చెన్నైనే. రాజస్థాన్‌ 2022 ఎడిషన్‌లోనూ తొలి 11 మ్యాచుల్లో పదింట్లో టాస్‌ను కోల్పోయింది.

గుజరాత్‌ జట్టు (అంచనా): వృద్ధిమాన్‌ సాహా (వికెట్ కీపర్), శుభ్‌మన్ గిల్ (కెప్టెన్), సాయి సుదర్శన్, డేవిడ్ మిల్లర్, అజ్మతుల్లా ఒమర్జాయ్, రాహుల్ తెవాతియా, షారుఖ్‌ ఖాన్, రషీద్ ఖాన్, రవిశ్రీనివాసన్ సాయి కిశోర్, నూర్ అహ్మద్, మోహిత్ శర్మ

చెన్నై జట్టు (అంచనా): అజింక్య రహానె, రుతురాజ్‌ గైక్వాడ్ (కెప్టెన్), డారిల్ మిచెల్, శివమ్‌ దూబె, మొయిన్‌ అలీ, రవీంద్ర జడేజా, ఎంఎస్ ధోనీ (వికెట్ కీపర్), మిచెల్ సాంట్నర్, శార్దూల్ ఠాకూర్, రిచర్డ్ గ్లీసన్, తుషార్ దేశ్‌పాండే.